mr snowbearson

Hversdagslífið

2007-12-03T16:45:00.001-08:00

Mér reynist mjög erfitt að blogga þegar lífið gengur sinn vanagang. Ég er ýmist að sofa, borða, læra eða að fá mér þennan "eina"... Þessi endurtekna atburðarrás er ólíkleg kveikja að frásögn eða hugleiðingu. Fyrir vikið einkennist bloggsíða þessi einkum af ferðalögum og öðrum áhugaverðum uppátækjum sem brjóta upp flatneskju hversdagsleikans. Mr. Snowbearson er eins konar "alter ego" sem gerir bara áhugaverða hluti. Hér kemur hins vegar stutt frásögn af áhugaverðum atburð sem átti sér stað undir mjög hversdagslegum kringumstæðum.

Um daginn sat ég í neðanjarðarlestinni og var á leið heim, tiltölulega seint um kvöld. Við hliðina á mér sat gamall og virðulegur svartur karl með grátt skegg. Inn í lestina steig ungur horaður hvítur karlmaður, með fulla meðvitund, gekk milli manna og bað um ölmusu. Fyrrnefndur karl svaraði betlaranum hátt og skýrt, "fáðu þér vinnu". Betlarinn hóf þá mikla en samhengislausa ræðu um erfiðleika sína. "Hvað kanntu", svaraði karlinn. "Ég er byggingaverkamaður" svaraði betlarinn. "Ef þú villt vinna, þá vantar mig fólk" svaraði karlinn. Betlarinn var talsvert lengi að átta sig á stöðu mála en að lokum varð hann mjög spenntur, fékk lánaðann penna og skrifaði símanúmer gamla karlsins á vinstri upphandlegg sinn. Sammæltust þeir um að hann hefði samband daginn eftir.

Í London er mikill fjöldi af betlurum og vanalega er þeim svarað annaðhvort með "klínki" eða hundsun. Ég velti því fyrir mér hvernig rættist úr þessu einstaka tilfelli. Hafa gamli karlinn og betlarinn staðið við sitt?

Tívolí og Róm

2007-11-16T08:49:00.000-08:00

Ég er nýkominn heim úr vikulangri námsferð til Tívolí og Rómar.

Tívolí er bær í útjaðri Rómar, einkum frægur fyrir rústir rómverskrar sumarhallar, "Villa Hadriana". Hadríanus keisari, sem var mikill áhugamaður um byggingarlist lét reisa höllina. Einstakir hlutar hennar eru byggðir á byggingum sem hann sá á ferðalögum um heimsveldið. Þessar ólíku einingar eru settar saman á mjög frjálslegan hátt og mynda eins konar þorp. Mæli eindregið með heimsókn til Tívolí, einkum fyrir áhugamenn um fornaldarmenningu.

Vinnustofunni var skipt hópa og minn hópur fékk það verkefni að mæla og teikna þversnið í gegnum höllina. Þetta var mjög spennandi og taugastrekkjandi verkefni einkum þar sem bannað er að mæla á svæðinu!? Við náðumst ekki en mér tókst hins vegar að skera mig á málbandi. Laumuspil og blóðsúthellingar, mjög dramatískt og rómverskt.

Við getum valið úr nokkrum stöðum til þess að vinna með í aðalverkefni vetrarins, Sumarhöll Hadríanusar er þar á meðal. Ég er að hugsa um að velja hana, mjög freistandi samhengi.
Eftir að hafa eytt þremur dögum í Tívolí fórum við til Rómar. Við skoðuðum Forum Romanum, Pantheon, Colosseum, byggingar eftir Bramante, Borromini, Bernini, Michaelangelo, Raphael og ýmislegt þar á milli. Á kvöldin voru miklar matar- og rauðvínsveislur. Sem betur fer var flugið nánast gefins.

Mér fannst ég mjög lítilfjörlegur er ég gekk um stræti miðborgarinnar. Hurðarhúnar eru gjarnan í augnhæð, hurðirnar sjálfar 3 til 4 metra háar og allur frágangur mjög tröllskessulegur. Þetta stuðlaði að minnimáttarkennd, sem er eflaust markmið byggingarlistar af þessu tagi. Þetta er hins vegar ekki algild regla og hverfi borgarinnar hafa ólík einkenni.

Mér tóksta að sjá páfann. Hann var keyrður niður tröppurnar fyrir framan Vatíkanið í "the popemobile". Á torginu heiðraði hann um 100 kokka sem voru allir í fullum skrúða. Sérstakt.

Róm er líklega ein af þessum borgum sem maður þyrfti að heimsækja aftur og aftur.

Ég mun snúa aftur.

Emma Tompson + Judi Dench + Kenneth Branagh + Robbie Coltrane + Alan Rickman + Derek Jacobi

2007-10-29T13:00:00.001-07:00

Ég fór á tónleika í gærkvöldi. Júlía Traustadóttir söngnemi við Royal College of Music átti frímiða á góðgerðartónleika sem voru helgaðir kvikmyndatónskáldinu Patrick Doyle. Hann hefur samið tónlist við myndir eins og Hinrik V og Carlitos Way. Tónleikarnir voru ágætir, aðeins of mild efnisskrá fyrir minn smekk. Það sem gerði þá verulega eftirminnilega var fjöldi nafntogaðra Breta. Emma Tompson, Judi Dench, Kenneth Branagh, Robbie Coltrane, Alan Rickman, Derek Jacobi og fleiri voru fengin til að kynna og taka þátt. Þetta var sérstök upplifun. Það er talsverður munur að sjá fólk í eigin persónu og á tjaldi eða skjá. Burt séð frá því finnst mér stjörnur frekar hversdagslegar þegar allt kemur til alls.

Helgarferð til Spánar

2007-10-28T08:50:00.000-07:00

Ég fékk það verkefni að skoða nýja íbúðarturna eftir Abalos & Herreros í Vitoria-Gasteiz sem er rétt hjá Bilbao. Ég skrapp þangað síðustu helgi til þess að taka myndir og gisti tvær nætur. Bekkjarsystir mín á fjölskyldu þarna og ég hitti frænku hennar sem rekur gallerí. Hún og kollegi hennar fóru með mig á Basknest kráarrölt sem felst í Pinchos áti og bjórdrykkju. Skemmtileg ferð, tók 200 myndir og er ennþá að jafna mig. Tvær vinnunætur og yfirferð í þessari viku eru heldur ekki að hjálpa.

"Unlike the confines of Bedford Square"

2007-10-27T16:30:00.000-07:00

Skólinn kemur skemmtilega á óvart. Það eru þrír arkitektúrskólar í miðborginni, AA, Bartlett og London Metropolitan. London Met virðist vera í stríði við hina skólana, það má allavega skilja af ummælum kennara og nemenda á opinberum og óopinberum vetvangi. Sumir kennararnir virðast eiga einhverja sögu innan AA og/eða Bartlett. Almennt séð virðist inntak stríðsins vera að Bartlett og AA séu veruleikafirrtir og elitískir fílabeinsturnar. Þetta endurspeglast með mjög áþreifanlegum hætti í skólagjöldum. Í AA kostar veturinn um það bil tvisvar sinnum meira.

London Met skilgreinir sig frá hinum skólunum með eins konar “realisma”. Skólinn tortryggir mjög arkístjörnur og maður verður að fara varlega með tilvísanir í Hadid eða Koolhaas. " Participatory design" og námsferðir til Indlands þar sem unnið er að rannsóknar- og umbótastarfi í ólöglegum fátæktarhverfum eru önnur einkenni sem vert er að nefna. Þetta er allt að því dálítið hippalegt. Reyndar er talsverður munur á vinnustofunum, en samnefnarinn er einhvers konar “realismi". Ég er frekar sammála mínu liði og tel mig því hafa valið rétt.

“If I´m not in the office, you will find me in the Baily”

2007-10-27T15:20:00.001-07:00

Ég er smám saman að eignast vini í skólanum, slatti af skemmtilegu og áhugaverðu fólki. Upp til hópa gríðarlega áhugasamt, jafnvel of í sumum tilfellum. Það er hvetjandi að vinna innan um einstaklinga sem dreymir um eftirtekt í mannmergðinni. Það er kannski einn helsti kostur þess að læra í borg af þessari stærðargráðu.

Á móti skólanum er krá, the Baily. Þarna kynnist maður samnemendum og jafnvel kennurum með “kemískri” aðstoð. Þar að auki er ég svo heppinn að eiga nokkra vini í öðrum skólum í borginni og nærsvæði hennar. Það hjálpar mjög að geta skipt algerlega um félagsskap.

Samnemendur mínir virðast sérlega gáfaðir og "articulate". Mér finnst ég hljóma heimskulega á yfirferðum. Byrjunarörðugleikar í tungumálinu koma þar inn í dæmið. Það hlýtur að lagast. Þangað til reyni ég að skrifa niður það sem ég ætla að segja. Ef allt annað klikkar, kinka ég kolli.

Fréttir frá London

2007-10-27T15:19:00.003-07:00

Héðan er allt ágætt að frétta. Það er orðinn um það bil einn og hálfur mánuður síðan ég flutti. Fyrstu tvær vikurnar liðu frekar hægt, enda fóru þær einkum í vesen og þvæling. Síðan þá hefur skólinn yfirtekið tilveru mína. Ég bý tiltölulega miðsvæðis, “zone” 2 af 6. Hins vegar þarf ég að fara í gegnum fjármálahverfið til þess að komast úr og í skólann. Það tekur 40 til 60 mínútur hvora leið, neðan- og ofanjarðar. Ég er orðinn mjög þjálfaður í "stórborgar-maurahegðun".

Einn kostur þess að eyða svo miklum tíma í ferðalög er tíminn sem gefst í bókalestur. Síðan ég kom hef ég lesið tvær bækur eftir Le Corbusier, eina eftir Rossi og tvær eftir Jencks. Núna er ég að lesa bók eftir Herreros.

Ég ætla flytja í næsta mánuði, leigan sem ég er með rennur út bráðlega. Bekkjarfélagi minn, hinn írski Robert Mckluskey og ég ætlum að leigja saman. Við erum að skoða eina góða íbúð, rétt hjá skólanum, vonandi gengur það dæmi upp.

Tadaaa

2007-10-27T15:19:00.001-07:00

Hérmeð er þessi bloggsíða formlega tekin í gagnið. Til hamingju netheimur, nú munnt þú innihalda enn meira blaður.

húrra, húrra, húrra, húrraaa